Untitled Document

عدد المشاهدات : 1062

رومانسية

كان يا مكان كان في بنت زمان اول مرة تحس فيها بالحب بيملى قلبها الصغير اول مرة تحس فيها بسعاده بتاخدها لعالم ساحر جميل ، وروده بيضاء و زرعه اخضر تنثر فيه الملائكه حولها النجوم و اللالئ في سماء قزحية اللون و هي في وسط الجنه دي اميرة لابسه فستان ابيض ساعة ما دخلت المسجد اول مرة في حياتها ساعة ما لبست طرحة الصلاة لأول مرة في حياتها كان عمرها 5 سنوات و كانت لسه بتتعلم الصلاة فرحت قوى لمّا مامتها قالت لها انها تقدر تدعي قبل الصلاة او بعدها و تطلب اى حاجه من ربنا اول حاجه قالتها البنت يا رب انا بحبـــــــــــــــك قوى يا رب يا رب يارب خليني احب الدنيا كلها طول عمري احب حتى الناس اللى مش بيحبوني خليني اعمل كل حاجــــــه كويسه تخليك تحبنـــي يا رب البنت دي كبرت ..... و لسه بتدعى كل يوم نفس الدعوة و بتقول لربنا في صلاة الفجر انها بتحبه كل يوم و بتقول لرسول الله صلى الله عليه و سلّم انها تحبه كل يوم و بتقول لفلسطين و للعراق انهم في قلبها كل يوم بتحاول تعمل حاجه بسيطه كل شويه لكل الناس اللى محدش بيحبهم و محدش عايزهم زي الأطفال المعاقين و المرضى و غيرهم و بتشترى لمامتها بوكيه ورد جميل كل فترة و بتحاول تعمل حاجه تسعد اسرتها على اد ما بتقدر و النهارده الفجر ... قررت انها متهاجمش يوم الحب و كمان متحتفلش بيه مخصوص لأنها ببساطه بتحب كل يوم بتحب الله و الخير و الناس و قررت انها تعمل الرسالة دي في حب الله و تزينها بالقلوب و الورود وتبعتها النهارده الثلاثاء 4/11/2008 عشان هي واثقه انها لو كانت بعتت الرسالة دي في اى وقت تاني غير النهارده مكنتوش حتاخدوا بالكم منها كده عشان كده هي قررت متضيعش الفرصه طبعاً انا هي البنت المزعجه بس الرسالة لسه مخلصتش اسمحوا لى بكلمتين كمان اني بيتهيأ لى ان احنا اللى ساجنيين نفسنا جوه نفسنا كل مخلوقات الله بتعرف تحب... بجد و العالم كله السماء و الأرض و الجبال و الأنهار و الفراشات و الطيور والطبيعه كلها كتله من الرومانسيه لو كان نظرك ضعيف و مبتشوفش من الحب غير النهارده ولو كنت من المراهقين اللى بيتمنظروا وسط اصحابهم انهم منكدين عيشة اهاليهم حاول النهارده على الأقل انك تخسر الرهان مع اصحابك مين يحرق دم اهله اكتر و خلي والدتك تتسند عليك و هي نازله تنقى الخضار من السوق و ساعدها شويه يعنى اجيب لك بطاطس يا ماما ... منفسكيش تشترى قلقاس و كده يعني و حاولى النهارده على الأقل تبتسمي في وجه والدك و اول ما يصحى تقولي له تحب تفطر ايه يا بابا ..هو طبعاً زي ما حضرتك عارف انا مبعرفش اطبخ غير بيض مسلوق و جبنه بيضه بس برده تحت أمرك و لو كنت مش من المؤمنين اساساً بوجود الحب في الدنيا نظراً لأن تاريخ زواج حضرتك قديم حبتين فات عليه 15 سنه مثلاً حاول يكون في دائماً مكان و وقت لورده ورده واحده بس مش حتخسّر الميزانيه و تحرم الأولاد من التعليم يعنى و بلاش نظرية ان الأولى حزمة الفجل بدل بوكيه الورد دي و لو معندكش ادنى شك في انك بتعرف تحب صح و بتعرف تحب بجد طول الوقت يبقى ارجوك .......اخواتك اللى انشغلت عنهم بحجة البيت و الأولاد و قاطعتهم و استمتعت بمقاطعهم اتحجج النهارده عشان تسأل عليهم اكيد لسه ليهم في قلبك مكان بس انت اللى نسيت طريقه ... افتكر كويس انت كنت شايلهم في البطين الأيمن و إللا الأيسر و طبعاً انا بكلّم حضارتكو بالذات في النقط اللى فاتت عشان باقي الناس اللى بالى بالكم مش ناقصين توصيه كان نفسي نكون في دنيا الأحلام دلوقتي عشان كنت احضر بوكيه ورد حقيقي مليان بأندر و اجمل الورورد في العالم و احوله لشفرات احطها في رسالتى دي عشان لمّا حضراتكو تفتحوا الجهاز بتاعكوا و تبتبدوا تقروا الرسالة تشموا عبير الزهور الجميله و تحولوا الشفرات و تستلموا البوكيه ورد حقيقي تاني معلش بقى انا معتمده على خيالكم في الموضوع ده و كفايه النيه متوفرة بحبكم في الله قوي قوي قوي اد الدنيا دي كلها

منارعقل